१७ कात्तिक, दोलखा। दोलखाबाट काठमाण्डौँ तर्फ जाँदै गरेको यात्रुबाहक बस सिन्धुपाल्चोकमा दुर्घट्ना हुँदा ६ जनाको मृत्यु भएको छ । बस सिन्धुपाल्चोक बलेफी गाउँपालिकाको सुकुटेस्थित सुनकोशी नदीमा बसेको हो ।

घट्नामा २० जना घाइते भएको प्रहरीले जनाएको छ । पाँच जनाको घटनास्थलमै र एक जनाको उपचारका लागि अस्पताल लैजाने क्रममा मृत्यु भएको जिल्ला प्रहरी कार्यालय सिन्धुपाल्चोकका प्रहरी नायव उपरीक्षक माधवप्रसाद काफ्लेले जानकारी दिए । दुर्घट्नामा मृत्यु भएकाहरुको नाम ठेगाना खुलिसकेको छैन । उनका अनुसार २० जनाको उद्धार गरिएको छ । उद्धार गरिएकाहरुलाई उपचारका लागि अस्पताल लगिएको छ ।

बसमा कति जना यात्रु थिए भन्ने एकिन नभएकोले अझै केही यात्रु पानीमा हराएको हुनसक्ने अनुमान गरिएको छ । दोलखाको मागादेउरालीबाट काठमाडौं जाँदै गरेको बा२ख ७२४५ नम्बरको बस दुर्घट्ना भएको हो । बस सडकबाट करिब सय मिटर तल नदीमा खसेको प्रत्यक्षदर्शीले बताएका छन् ।