१९ भदौ, काठमाडौं । नेपाल टेलिकमको मोबाइलमा समस्या आएपछि सेवाग्राही समस्यामा परेका छन् । टेलिकमद्धारा संचालित प्रिपेड र पोस्टपेड दुवै मोबाइलमा मंगलबार बिहानैदेखि समस्या देखिएको छ । फोन सम्पर्क हुन नसक्ने समस्या आएपछि देशभरका लाखौं सेवाग्राही मारमा परेका छन् ।

टेलिकमको नेटवर्कमा खराबी आएपछि बिहानैदेखि नेपाल टेलिकमका देशभरका मोबाइल फोन अवरुद्ध छन् । ल्यान्डलाइन भने पूर्ववत रुपमा सञ्चालन भइरहेको टेलिकम अधिकारीहरुले जनाएका छन् ।

उनीहरुका अनुसार मंगलबार बिहान ६ बजेदेखि प्रि(पेड र पोस्टपेड मोबाइलमा एक्कासि फोन नलाग्ने समस्या आएको हो । मोबाइल नेटवर्कमा के कारणले खराबी आएको हो भन्ने विषय पहिचान भैनसकेको टेलिकमले जनाएको छ ।

समस्या समाधानका लागि प्राविधिकहरु खटिएकाले फोन सेवा छिट्टै सुचारु हुने टेलिकमको भनाई छ ।